Amicos valida a accesibilidade cognitiva do Camiño de Santiago no Barbanza, A Orixe

Este mércores 26 de outubro o grupo de validadores da Asociación Amicos encabezado por Macarena, residente no fogar da asociación comarcal Amicos, presentou nun acto institucional celebrado na sede ribeirense da entidade un pequeno vídeo explicativo co que sería a colocación do primeiro sinal de accesibilidade do itinerario xacobeo da nosa comarca, O Camiño A Orixe. A colocación foi na contorna do Faro de Corrubedo.

Estes traballos abéiranse ao proxecto Abrindo Camiño, iniciativa que pretende poñer en valor o patrimonio natural e cultural do itinerario xacobeo da nosa comarca. O proxecto é beneficiario do programa O Teu Xacobeo da Xunta de Galicia.

No acto de presentación contouse, entre outros, coa presenza de Manuel Mariño, presidente da Asociación Amigos do Camiño do Barbanza, A Orixe, quen adicou unhas palabras ao traballo de Amicos e o seu equipo de validadores: “É importantisimo que persoas como vós poidades facer este camiño, desde a asociación sempre pensamos que o Camiño A Orixe ten que ser para todos e todas, vós teredes sempre un espazo no noso itinerario, xa que sodes uns peregrinos modernos e actuais”.

Tamén asistiu Fátima Cachafeiro, xerente da Mancomunidade do Barbanza Arousa que comentou o seguinte: “Quero agradecervos este esforzo en realizar o camiño para todos, xa que é moi importante para os nosos produtos turísticos, neste camiño podemos recibir todo tipo de viaxeiros, e para iso é moi necesario esa accesibilidade, tanto física, cognitiva, auditiva, etc. Temos que camiñar sempre cara a un turismo para todos”.

Dos concellos polos que transcorre o camiño, Antonio Fernández, alcalde de Padrón mostrouse “orgulloso de estar hoxe aquí, é un pracer, a verdade é que cando vexo proxectos deste estilo, a un se lle incha o peito por poder participar en iniciativas coma esta, quero felicitar a ese equipo especial de validadores polo gran traballo realizado”.

Tamén estivo presente Xosé Lois Piñeiro, alcalde da Pobra, quen dixo que “este camiño é novo, e quédanos moitisimo por mellorar para todas as persoas, pero a vosa visión axúdanos moito”.

Pechou as intervencións, Ramón Doval, tenente alcalde do Concello de Ribeira, que agradeceu a Amicos por seguir facendo un “labor excepcional” e “un informe moi necesario, esperemos poder mellorar este camiño canto antes”.

Abrindo Camiño comezou a andar o día 11 de agosto dende o Faro de Corrubedo. Na primeira xornada a comunidade de Amicos estivo acompañada dun grupo de voluntarios europeos do programa Xacobeando. Percorréronse 16,7 quilómetros, detectándose no traxecto as necesidades de accesibilidade do tramo ata alcanzar a súa meta, na Guía (Carreira).

A segunda etapa iniciárona o día 25 de agosto, esta vez percorreron parte da segunda etapa, saíndo desde A Guía ata a súa chegada a Pobra do Caramiñal, novamente acompañáronnos o grupo de mozos do programa Xacobeando, durante esta etapa o grupo tamén fixo entrega dun pack que contiña diverso material (unha gorra, camiseta, cantimplora e unha bolsa de tea), aos viandantes cos que se atopaban no transcurso do camiño.

As seguintes etapas, as recorreron no mes de setembro, levando tamén a cabo a análise da accesibilidade do camiño e dando a coñecelo os viandantes que se atopaban no transcurso das xornadas. Nestas os camiñantes estiveron acompañados por integrantes da Asociación Cultura Pedra da Aroña, e tamén nenos e nenas do CEIP Castelao de Rianxo e o CEIP de Vite.

A acto finalizou cun café servido polo equipo Ñam Ñam de Amicos.