A decisión da Comisión Europea de aplicar medidas que, na práctica, conducen á pesca de arrastre de fondo á súa desaparición, está a dar motivos máis que dabondo para o cabreo cando non, como mínimo, para o enfrontamento dialéctico entre os partidos políticos, especialmente en Galicia onde o secretario de Organización dos socialistas galegos, José Manuel Lage Tuñas, esixiu ao presidente da Xunta, Alfonso Rueda, que viaxe a Bruxelas para convencer ao PP europeo -que ten a maioría no seo da devandita Comisión- para que se retire “un Regulamento tan prexudicial para a frota galega” (obviamente, a frota de arrastre de fondo nas súas distintas modalidades). Lage Tuñas advertiu tamén ao presidente do goberno galego que, de non facelo así, ía converterse en cómplice da decisión que prohibe esa pesca de arrastre.
José Manuel Lage Tuñas é un político galego cocido xa en mil batallas municipais, provinciais e autonómicas. Da e recibe. E non dubida moito cando ten que se meter en fariña, sexa ou non esta da súa saqueta. Desta vez a dun sector, o pesqueiro, que non resulta descoñecido para el. Por esto, precisamente, e sabedor da liorta na que entraba, puxo dediante á Xunta para deixar claro que, ao seu criterio, esta “non fixera nada” para defender ao sector pesqueiro galego diante dunha norma que atenta contra os seus intereses.
Para Lage, o presidente da Xunta actúa coma un “presidente silente”, fronte a quen, como é o caso do secretario xeral do PS de G-PSOE, Valentín González , foi quen de acadar o compromiso do Comisario de Medio Ambiente, Océanos e Pesca de revisar o veto ao arrastre si se aportan informes científicos que así o acrediten.
Evidentemente, Lage Tuñas, no seu papel de defensor dos intereses do seu partido político, remou a prol do presidente do Goberno -tamén secretario xeral do PSOE- quen, en sintonía co goberno francés, dixo, amosou o seu malestar polo Regulamento , anunciando a máis a inclusión dun punto, para o vindeiro Consello de Ministros de Agricultura e Pesca, co obxectivo de revisar esa normativa.
Lage Tuñas non falou do ministro de Agricultura do Goberno español e tampouco o fixo da secretaria xeral de Pesca deste Ministerio, voces ás que se supón un gran valor nas instancias comunitarias de Pesca. Polo menos tanto como as dos lobbys ecoloxistas que, tamén en Bruxelas, se fan escoitar con tanta ou máis forza que os representantes do Executivo español. Deste, que preside como é sobradamente coñecido o socialista Pedro Sánchez, como os anteriores. Porque España, dende o seu acceso á Unión Europea, non se ten significado precisamente pola súa defensa dun sector tan íntimamente vinculado a Galicia como é o da Pesca. Hei dicir tamén que descoñezo o valor da aportación feita a Francia por España para obter o beneplácito do eurocomisario de Pesca de cara a revisar ese veto si as circunstancias así o demandan, que é dicir tanto tanto como non comprometerse a nada.
Así calquera. Máxime, sen ter que viaxar a Bruxelas en demanda de explicación. Porque a resposta do eurocomisario Sinkevicius xa se pode adiantar sen medo ao erro: non hai informes que xustifiquen a retirada do Regulamento de pesca de fondo.
Cando tal pronunciamento sexa efectivo, moi probablemente nin PP, nin PSOE van culpar á Comisión. Tampouco aos ecoloxistas.
