A deputada socialista Noa Díaz insta á Xunta a esixir o cumprimento íntegro do contrato ás empresas concesionarias do transporte escolar Santiago de Compostela, 21 de setembro de 2022. A parlamentaria do grupo socialista Noa Díaz rexistrou unha iniciativa parlamentaria para que o goberno galego esixa ás empresas concesionarias do transporte escolar nas comarcas de Barbanza, Muros e Noia que cumpran o
contrato de maneira íntegra, xa que considerou que o “desleixo” da Xunta é a causa principal do deterioro do servizo.
A deputada Noa Díaz amosou unha gran preocupación polas deficiencias do servizo de transporte escolar nas comarcas de Barbanza, Muros e Noia que están a denunciar os centros e as familias.
Son máis de 100 as denuncias comunicadas dende os centros educativos e existen comunicados de protesta por parte das anpas, como no caso de Ribeira.
A situación é máis grave dado que o contrato da nova concesión leva consigo unha mellora integral do servizo e, polo que denuncian os distintos afectados, estanse mantendo as mesmas “condicións deficitarias”. Ante isto, Díaz denuncia que a Xunta está a actuar de maneira pasiva, sen ningún tipo de supervisión.
Entre os déficits máis marcados nestas comarcas, e só por poñer algúns exemplos, a deputada do PSdeG destacou que hai días que a liña Muros-Noia-Santiago non fai o seu percorrido ou que en Ribeira denunciaran ata 55 incidencias e as anpas fixeran un comunicado conxunto.
No caso do concello de Boiro hai diversos problemas nos centros públicos, como que no CEIP Plurilingüe Abanqueiro, o transporte chega tarde á chegada, ou que algún autobús do CEIP Santa María do Castro chega moi xusto debido á saturación horaria por ter que compartir transporte co instituto, así como que no IES Praia Barraña, non conceden paradas para alumnado con discapacidade intelectual e a empresa incumpre diariamente o contrato deixando a rapaces sen recoller.
Por outra banda, a parlamentaria socialista subliñou que a normalidade que está a haber neste inicio do curso débese unicamente ao traballo dos equipos directivos dos centros, do profesorado e das familias. O mesmo conselleiro de Educación que anunciaba que este curso ía a ser “caótico”, está tratando de “apropiarse” da normalidade conseguida “a pesar da súa xestión” segundo Díaz.
Cabe destacar que a iniciativa socialista non só pide ao goberno galego que esixa o cumprimento dos contratos ás empresas concesionarias, senón que tamén busca realizar e publicar un informe de inspección de rutas, horarios, paradas e vehículos de que dispón as concesionarias para ter unha fotografía completa da solución de cara a solucionar as deficiencias.
