“Liberdade e igualdade” – José Manuel Pena

Machismo, igualdade, familia, independencia económica, relacións de igualdade, teito de cristal, prostitución, pobreza, violencia machista, feminismo, explotación, indignación, xustiza social …, son algúns adxectivos utilizados frecuentemente no libro Oito olladas sobre a folga feminista do 8 de marzo, por parte dunha empresaria, unha fotógrafa, unha estudante, unha xuíza, unha matrona, unha escritora, unha estudante e unha xornalista que escriben sobre a súa experiencia persoal nas mobilizacións do Día Internacional da Muller.

Millóns de mulleres toman as rúas, cada ano, en moitas cidades e pobos de España, con indignación e con determinación, con alegría e con rebeldía, reivindicando uns dereitos que aínda están lonxe de ser unha realidade. É unha revolución imparable e esperanzadora. Non pode nin debe darse un paso atrás polo ben da sociedade.

Na publicación, unha xuíza, referíndose a a liberdade e á igualdade das mulleres afirma que “só a través dunha mutación intrínseca de todos os conceptos e valores en democracia pódese chegar á verdadeira liberdade e igualdade”.

Queda moito camiño por percorrer, en España e non digamos noutros países, para conseguir a plena igualdade aínda que os avances foron moi significativos nas últimas décadas. En cambio en Suramérica, Asia e África seguen loitando, demasiadas mulleres, pola dignidade e a supervivencia, ante a infinidade de violacións dos seus dereitos fundamentais. As mulleres seguen sendo meros obxectos de desexo para as súas parellas e maridos, man de obra barata para os gobernantes e escravas de sistemas machistas e patriarcais.