Ambar fai balance do seu Proxecto Lique, centrado na defensa do medio ambiente e da inclusión

O Centro de Recursos da Asociación Ambar das Persoas con Diversidade Funcional, acolleu este 26 de setembro a presentación do Proxecto Lique, unha iniciativa promovida por Ambar e financiada polo GALP Ría de Arousa, enmarcada tamén no programa de actividades que se están levando a cabo polo 40 aniversario da entidade. O proxecto deu comezo no mes de xuño e está a piques de chegar á súa fin.

Milagros Rey, presidenta de Ambar, foi a encargada de facer a apertura da rolda de prensa e realizou a primeira intervención, na que agradeceu ao GALP Ría de Arousa polo labor de apoio e financiamento. Tamén agradeceu tanto a Rosana Olveira como a María Calvo por coordinar e dirixir todas as actividades que forman parte desta iniciativa.

Continuou coa presentación Rosana Olveira, coordinadora de Servizos de Atención Diúrna, quen se encargou de dar información máis concreta sobre a iniciativa. “O importe total da subvención é de 11.202,18 € subvencionábel ao 100%. 85% axuda do FEMP (9521,85€) e 15% axuda nacional (1680,33€)”. Tamén explicou cales foron os obxectivos e os resultados que querían acadar. “Pretendíase obter unha maior participación social nas actividades inclusivas propostas. Neste proxecto participaron 265 persoas das cales 59 foron familias e amigos” expuxo Rosana, engadindo que “ás familias participantes encantoulles participar e propuxeron volver a facer visitas e actividades deste tipo de xeito que poidan compartir o día con outras familias”.

Entre as actuacións e propostas desenvolvidos realizáronse actividades de promoción e difusión do proxecto, como é por exemplo a realización de material divulgativo informativo de lectura sinxela sobre os espazos protexidos. Tamén se fixeron visitas aos arquipélagos do Parque Nacional marítimo das Illas Atlánticas de Galicia e diferentes obradoiros en espazos naturais. “Organizamos dúas visitas á illa de Cortegada, outras dúas foron a Sálvora e dúas saídas ao Parque Natural de Corrubedo e Lagoas de Vixán e Carregal” puntualizou Rosana.

Pechou a rolda de prensa María Calvo, asistenta técnica de Arenaria Coordinación, explicando máis polo miúdo os obradoiros e visitas que se levaron a cabo. “En Sálvora, por exemplo, optouse pola visita á aldea, declarada Ben de Interese Cultural e á cal non se pode ir sen un guía acreditado” explicou María.

O Proxecto Lique pretende sensibilizar medioambientalmente á cidadanía sobre o coidado e preservación do entorno no que vivimos, potenciar a participación social activa dos cidadáns do territorio en prol do mellor coñecemento dos recursos costeiros e favorecer a cohesión social e o benestar social mediante a realización de actividades inclusivas ao aire libre nas que aproveitar os recursos do territorio. “Con esta finalidade levamos a cabo varios obradoiros, como por exemplo o de produtos de pesca e degustación dos mesmos”, comentou María, que dixo que a través dunha colección biolóxica real puideron aprender e descubrir curiosidades sobre as distintas especies. “A actividade rematou cunha degustación de produtos do mar que consistiu en empanada de choco e de xarda, mexillón en vinagreta con lima e tostas de sardiña en conserva con queixo e xarda afumada con vexetais”, concretou a asistenta técnica de Arenaria Coordinación.

O Proxecto Lique dará o seu remate este martes 27 coa última actividade do programa que consiste nunha saída ao Parque Natural de Corrubedo.