Volve o 26 de agosto, ao seu formato tradicional, a Andaina Solidaria de AGADEA

Volve ao seu formato habitual a Andaina Solidaria Os Camiños de Memoria, organizada pola Asociación AGADEA, logo de dous anos de celebración virtual. Así o confirmaron este xoves 11 de agosto os responsábeis da entidade e máis do Concello de Ribeira, poñéndolle data ao dito evento solidario: o venres 26 de agosto celebrarase a sétima edición desta iniciativa que busca visibilizar e sensibilizar á poboación sobre a doenza do alzhéimer. Na presentación participaron a concelleira de Servizos Sociais, Ana Barreiro; a presidenta de AGADEA, Isabel Gey, a coordinadora da asociación no centro emprazado en Ribeira, Laura Somoza, e máis Eduardo Iglesias, da Asociación Arousa Neo que colabora na organización.

A cita comezará ás 20.30 horas con saída e meta no parque García Bayón. O percorrido, de 8 quilómetros de distancia con dificultade media-baixa, descorrerá por Coroso, o entorno de Pedra das Cabras, a congostra da Carballa, As Saíñas e volta por Coroso ata o punto de partida. Haberá a posibilidade de acurtar a ruta a 6 ou 3 quilómetros pensando naquelas persoas que no se vexan con forzas para completar todo o traxecto.

O grupo Tahume amenizará a saída dunha proba na que os participantes recibirán unha camiseta conmemorativa. O trazado contará con puntos de avituallamento.

Inscricións

As inscricións á andaina pechan o día 24 ás 13 horas, podéndose formalizar na páxina web www.agadea.org. O custe é de 5 euros (os menores de 12 non pagan). O límite máximo é de 250 persoas, cifra que se espera alcanzar do mesmo xeito que nas últimas edicións físicas se foi conseguindo sempre chegar ao tope, que nun principio era de 150 participantes e despois de 200. Existe un dorsal 0 para que queira colaborar.

Ana Barreiro felicitou a AGADEA por esta iniciativa e agradeceu o seu labor a prol das persoas con alzhéimer e as súas familias no noso termo municipal. Pola súa parte, Isabel Gey incidiu na necesidade de seguir traballando a prol da prevención, especialmente despois dunha pandemia que empeorou a saúde mental de moita xente.