Como cada ano, a morte de bañistas está á orde do día nalgunhas praias perigosas. Concretamente no municipio de Ribeira hai unha longa columna de area, duns 5 quilómetros, que vai desde a praia de Anguieiro, na parroquia de Carreira, ata A Ladeira, na parroquia de Corrubedo. Ao longo de toda esta enorme extensión de area hai zonas moi propicias para o baño e con grandes garantías de seguridade, en cambio hai outros lugares onde as rompentes, correntes de resaca e os remuíños poñen en grave perigo a vida dos bañistas.
Algúns sabemos que unha das zonas máis seguras para o baño é o lugar de Anguieiro, de augas tranquilas e e unha praia sen sucos nin terreo irregular. A máis perigosa son a zona do Vilar, unha das máis frecuentadas, e xunto a desembocadura do río, próxima ás dunas de Olveira. Sempre hai algunha desgraza persoal pola existencia de fortes correntes que converten ao fondo mariño nun terreo irregular con sucos e remuíños. A xente, principalmente os visitantes que descoñecen a zona, ponse nerviosa ou entra en pánico e no canto de nadar en paralelo á beira nadan cara á praia, moitas veces contra corrente, esgótanse e entran en pánico. Daquela as correntes de resaca arrástranas mar dentro e, en moitas ocasións, chegan a perder a vida.
Todo isto sucede a pesar da existencia dos vixiantes da praia e socorristas. É moi importante a prevención e a colocación de paneis informativos coas recomendacións necesarias para público coñecemento de todas as persoas que e achegan a este praias para o baño. Tampouco estaría de máis que os propios socorristas desen algúns cursos rápidos ou indicacións, na propia praia, aos bañistas para saber o que terían que facer en situación de risco para as súas vidas.
