Pilotos de Noruega, Portugal e España sorprenderán coas súas exhibicións na “IV Concentración Moteira dos Reventapistóns”

O motoclub Os Reventapistóns vai celebrar entre o 16 e o 18 de setembro a cuarta edición da súa Concentración Moteira: unha iniciativa presentada este mediodía na casa consistorial nun acto que contou coa presenza e participación do concelleiros María Sampedro e Javier Sampedro e máis Aurosa Gómez e Sandra Hermo como integrantes do citado colectivo de afeccionados ás motocicletas.
A cita, cuxo punto de quedada estará xunto á praia de Coroso, arrancará na medianoite do venres 16 cunha sesión DJ con Planet Discomovil que estará amenizada por DJ Matrek e DJ Mateo Abelleira. Xa o sábado ás 12.30 horas haberá unha sesión vermú con mexillonada, empanadas e mercadillo moteiro amenizada polo grupo Drippers de Nando Jon. Ás 15.30 horas terá lugar unha carreira de coches por radiocontrol e unha hora máis tarde unha exhibición do catro veces campión de Portugal Acuko André.
A partir das 17.30 horas terá lugar unha ruta mototurística ata Boiro con parada en Abadía de San Enrique e ás 20 unha primeira exhibición de freestyle polos grandes pilotos Stig Frøsth (Noruega), Diogo Ribeiro (Portugal) e Adrián Garrido (España). Tras un show con lavamotos, os inscritos terán oportunidade de desfrutar dunha cea a cargo de Catering Arelas e a partir das 23 horas haberá unha ruta con
antorchas polos compañeiros caídos. Media hora despois desenvolverase o segundo pase da exhibición de freestyle antes de dar paso á medianoite a unha sesión DJ con DJ Sonic, DJ Josy Graver e DJ Xiba.
Por último, na sesión do domingo e tras un almorzo dos inscritos, terá lugar unha ruta mototurística con pinchada popular no Malecón e unha comida para finalizar ás 15.30 horas cun acto de reparto de
premios.
A concentración ten un límite máximo de inscritos de 200 persoas,aínda que por experiencias pasadas a concentración podería chegar a aglutinar ata unhas 3.000 motos se o tempo acompaña.

María Sampedro felicitou aos Reventapistóns por esta iniciativa e animou á entidade a que a facela seguir medrando.