Algúns analistas mesmo se atreven a comentar que non se debería seguir indagando nin lembrando sobre algo que aconteceu no pasado para non danar ou seguir criminalizando aos fillos e netos deses “narcotraficantes”, algúns dos cales xa cumpriron as súas condenas con penas de prisión. Entón, algúns nos preguntamos se teriamos que prescindir dos libros de historia ou tamén non lembrar o holocausto nazi, nin a ditadura franquista, entre outros acontecementos, porque danan e molestan a algúns dos seus familiares, seguidores, nostálxicos ou cómplices.
Xa está ben de tanta hipocrisía. Quen lle cura a dor a todas esas familias que perderon a algún dos seus membros por culpa da droga?. O peor de todo e a realidade é que o narcotráfico segue activo en Galicia e que algúns señores da droga e os capos do narcotráfico seguen facendo gala da ostentación e a impunidade. Para eles todo vale con tal de vivir no luxo e a abundancia, sen dar un pau á auga e co mínimo esforzo, mentres seguen tecendo a arañeira da mafia e a corrupción, a todos os niveis.
Foron moitos anos mirando para outro lado, mentres algúns membros de forzas de seguridade do estado, responsables políticos, certas empresas utilizadas como “tapadeiras”, entidades recreativas, culturais e deportivas beneficiándose do diñeiro doado por estes capos e moitos veciños en xeral que, voluntariamente e de maneira consciente, aproveitaban algunha que outra descarga e traballo puntual para sacarse algún diñeiro extra. Todos fomos responsables – uns por acción e outros por omisión – de que a mafia do narcotráfico seguise asentada en Galicia.
