Non vai de farol, polo que se pode deducir: o Ministerio de Agricultura, Pesca e Alimentación concederá unha axuda directa complementaria a empresas armadoras de buques pesqueiros. Deste xeito, o Goberno mantén en pé o seu compromiso de apoio á actividade das empresas pesqueiras fronte ás dificultades derivadas da invasión rusa de Ucraína.
O novo marco temporal de axudas de Estado establecidas pola Comisión Europea permite complementar a axuda directa que xa percibirán determinados armadores, cunha contía adicional de ata 40.000 euros por beneficiario. Esta axuda chega nun momento no que as distintas frotas pesqueiras españolas poñen riba da mesa a posibilidade de convocar unha folga en todos os portos da península e as illas.
O Real decreto-lei que contén a información sobre como se van complementar as axudas de Estado citadas recóllese no Boletín Oficial do Estado (BOE) deste martes. Refírese ás medidas de sostibilidade económica no ámbito do transporte, en materia de axudas ao estudo, así como de medidas de aforro, eficiencia enerxética e de redución de dependencia enerxética do gas natural- Serán beneficiarias destas axudas aquelas empresas que xa o foran destas, pero cuxo límite de 35.000 euros estabelecido no marco temporal de axudas á crise no momento da concesión impedira que cobraran o importe máximo asignado a cada buque, por contar con varios buques en cada unha delas.
A comunicación do 21 de xullo da Comisión Europea sobre o marco temporal de axudas de crise, permite incrementar o importe máximo a percibir por empresa ata os 75.000 euros.
Deste xeito, o ministerio aboará de oficio un importe de ata 40.000 euros que será complementario ao importe que corresponderá neste esceario ata acadar o novo máximo estabelecido.
