O colectivo de veciños e veciñas afectados pola falla do médico no Centro de Saúde de Palmeira manifestaron hoxe en rolda de prensa que o concello está a manipular a información sobre a necesidade de cubrir a praza de médico da vila a tempo completo.
A este respecto e tal como recollemos en “O Barbanza“, lembran que onte participaron nun encontro que o BNG organizou no Parlamento Galego, e no que se informou sobre unha proposta de cinco puntos, e que na cuarta pedía a reapertura dos Centros de Taragoña e Cabo de Cruz e cubrilo de Palmeira a tempo completo, votando o PP en contra.
O colectivo lembra que o pasado luns na concentración realizada en Palmeira a concelleira María Sampedro comprometeuse en nome do rexidor local a solucionalo tema. Este venres comunicouse que o alcalde recibirá o luns as 11 horas a unha representación do colectivo cidadán, que pola súa banda mantén para o luns as 21 horas unha nova reunión con todalas asociacións veciñais de Palmeira a unirse á mesma.
A Plataforma pola Sanidade Pública do Barbanza fixo unha convocatoria da comarca a celebrar o xoves 14 ás 20,30 horas diante do Consistorio ribeirense, unha concentración para pedir que se reabran os centros e se cubran as prazas médicas e para a que desde o colectivo palmeirán, amosan o seu apoio.
