CONGALSA abre o prazo de inscrición da súa VII Andaina Solidaria, que estrea formato híbrido

O pasado venres 15 de xullo, CONGALSA (empresa especializada en alimentación con sede na Pobra do Caramiñal) abriu o prazo de inscrición para unha das súas accións benéficas máis consolidadas: a súa Andaina Solidaria. Tratase dunha iniciativa que este ano alcanza a súa VII edición e que estrea formato híbrido neste contexto postCOVID: poderá realizarse de maneira presencial, na xornada do 11 de setembro, ou virtualmente (coma nos dous anos anteriores) entre o 1 e o 11 de setembro.

O prazo xa está aberto e as persoas interesadas poderán inscribirse até o vindeiro 31 de agosto. Para facelo, é necesario acceder á web de CONGALSA e entrar na ligazón habilitada para iso (www.deporticket.com), completando o formulario e abonando a cota de inscrición. Tamén é posíbel colaborar economicamente coa iniciativa sen ter que realizar a andaina, a través da adquisición do denominado dorsal número 0.

Cota solidaria

CONGALSA explica que “para realizar a andaina virtual, non existe límite de participantes”. Porén, para a presencial fixouse un tope máximo de 250 persoas. Os primeiros deberán abonar unha cota de catro euros e os segundos de tres e depositar un quilo ou litro de alimento non perecedoiro o día da andaina. CONGALSA doará todas as contribucións solidarias económicas, así como os alimentos, e converterá en euros todos os quilómetros realizados. Todo o recadado irá parar ás familias máis necesitadas da comarca do Barbanza. A andaina está aberta non só aos traballadores da empresa, senón tamén aos seus familiares, amigos, a representantes de entidades colaboradoras e a toda aquela persoa que queira colaborar, con independencia da súa localización xeográfica. O percorrido físico durará nove quilómetros e realizarase pola Serra do Barbanza.

Unha vez inscrito, cada participante recibirá por correo electrónico o seu dorsal, a ligazón para descargar a aplicación móbil, que rexistrará os quilómetros realizados, e un formulario ao que poderá remitir a súa fotografía co dorsal. A compañía realizará un vídeo conmemorativo da iniciativa, con imaxes dos participantes, que divulgará en diferentes canles corporativas.