Este venres 22 de xullo ás 22:30 a Asociación Ambar das Persoas con Diversidade Funcional inaugurou Mar Diverso, o festival de arte inclusiva e patrimonio costeiro, posíbel grazas ao financiamento do Grupo de Acción Local Pesqueira da Ría de Arousa. A primeira actuación do cartel tivo lugar na praza de Fefiñáns de Cambados. Presentouse unha peza escénica dirixida por Fran Sieira. O coreógrafo estivo traballando co grupo de artes escénicas de Ambar formado por Noelia Argibay, Ángeles Devesa, Marina Mondelo, Conchita Mouriño, Carmen Pérez, Paula Ramallo, Montse Queiruga e Mercedes Ríos, coñecidas polas performace Elas e As paisaxes de Camille e galardoadas co premio Begoña Caamaño no 2021.Nestes últimos meses compuxeron unha peza escénica única que fala de costa, de mar e transpórtanos a través da arte, do movemento e a música ao que a elas lle inspira o lugar no que vivimos.
“Non só é importante a idea de poñer en valor o patrimonio costeiro, senón tamén a de poder coñecer de primeira man o método de traballo de cada artista e á súa vez que eles poidan apreciar o talento e o potencial que hai na diversidade, de forma que tamén se leven algo de nós”, comentou Zeltia Iglesias, técnica de inclusión de Ambar.
Mar Diverso é como dixemos un festival de artes escénicas e plásticas inclusivo que pon en valor o patrimonio mariñeiro a través de accións artísticas de persoas con diversidade funcional dentro da contorna costeira da ría de Arousa, vencellando así creación, inclusión e territorio.
Mar diverso estarase celebrando entre os días 22 e 31 de xullo,
Cronograma do festival
Xullo do 22 ao 31
o Venres 22 ás 22:30H
Peza escénica dirixida por Fran Sieira na praza Fefiñáns , Cambados
o Martes 26 ás 12:30H
Mural composto por Sokram no porto de Escarabote, Boiro
o Mércores 27 ás 12:30H
Obra plástica dirixida por Tere Ramallo no paseo Praia da Torre, Rianxo
o Xoves 28 ás 12:30H
Peza escultórica dirixida por Mar Ramón na Praia das Salinas, Illa de Arousa
o Venres 29 ás 22:30H
Peza escénica dirixida por Fran Sieira na Praza da Igrexa, Ribeira
o Domingo 31 ás 12:30 H
Peza escultórica dirixida por Óscar Aldonza no Mercado de Abastos, A Pobra
