En Ribeira a Escola Municipal de Ballet levará a escena a versión musical de “soño dunha noite de verán” no seu festival de fin de curso

Tras dous anos de pandemia, o alumnado da Escola Municipal de Ballet de Ribeira regresará ás táboas do Auditorio Municipal este domingo 12 de xuño para celebrar o seu festival de fin de curso: un evento incluído dentro da vasta programación do Xuño da Cultura e as Artes que foi presentado esta mañá pola concelleira de Cultura, María Sampedro, e a directora da citada escola, Cristina Riveiro.
“Soño dunha noite de verán”. Esa será a composición que van escenificar medio cento de integrantes desta entidade municipal, unha creación composta por Felix Mendelssohn a partir da célebre obra teatral de William Shakespeare e adaptada por parte da propia Riveiro.
A profesora explicou que o amor romántico do argumento orixinal foi substituído por unha liorta entre dúas amigas pola simpatía dunha fada, o que fai que unha delas encomende ao trasno traveso un
feitizo. Elfos, Trasnos, Fadas ou Vagalumes despregaranse sobre o escenario para ofrecer á audiencia un espectáculo que terá unha duración aproximada dunha hora, para concluír coa tradicional entrega de diplomas.
A representación dará inicio ás 19.30 horas e as portas abriranse media hora antes. A entrada é gratuíta ata encher aforo.
A concelleira de Cultura, María Sampedro, loou o gran traballo de Cristina Riveiro na difusión da danza clásica a través da escola municipio e animou á veciñanza a que acudan a presenciar este fermoso e traballado espectáculo.