A Deputación celebra o Día da Diversidade cun congreso e o documental “Noite irisada” (con proxeccións en Noia, Rianxo, A Pobra e Ribeira)

10 Xuño 2022

O Pazo de Mariñán (Bergondo) acolleu este 10 de xuño a primeira xornada do II Congreso A Memoria Diversa, unha das actividades de Liberdade de ser e de sentir, a campaña que a área de Igualdade da Deputación da Coruña impulsa co gallo do 28 de xuño, Día da Diversidade Sexual. O obxectivo é “sensibilizar sobre a importancia da tolerancia e a igualdade, con independencia da súa orientación sexual e identidade de xénero”. Este sábado celebrarase a segunda das dúas xornadas do simposio.

O programa comezou co relatorio A nosa memoria tamén é diversa, no que interviñeron a responsábel provincial de Igualdade, María Muíño, e Marcos Gabriel López, comisario dun congreso que, en palabras de Muíño, “pon fronte a fronte o pasado co presente, mais tamén co futuro, e permítenos coñecer e partillar espazos con persoas que, coa súa experiencia e coa súa loita, marcaron o camiño do recoñecemento e da dignidade”.

A deputada tamén se referiu a importancia doutra das actividades da campaña Liberdade de ser e de sentir: a proxección de Noite irisada, o documental de Bea G. Campaña, obra singular e única sobre a temática LGBTI no contexto histórico do audiovisual galego, que recolle as testemuñas das protagonistas polos dereitos das persoas diversas sexualmente. A película conta a historia dunha loita non exenta de represión, coa data de referencia do 28 de xuño de 1981, cando se celebrou en Vigo a primeira manifestación do Día do Orgullo organizada polos colectivos activistas de gays e lesbianas de Galicia. O filme chegará ao alumnado de catro centros de ensino e terá outras oito proxeccións abertas ao público en xeral: en Narón, o 24 de maio (ás 12.30 horas no IES As Telleiras); Culleredo, o 27 de maio (11.30, na Universidade Laboral); Betanzos, o 10 de xuño (Cine Alfonsetti, hora por confirmar); Noia, o 21 de xuño (10.30, IES Campo de San Alberto); Carballo, o 11 de xuño (20.00, Pazo da Cultura); Arteixo, o 21 de xuño (17.00, Auditorio do Centro Tecnolóxico); Teo, o 25 de xuño (19.30, Biblioteca dos Tilos); A Pobra, o 26 de xuño (20.30, Teatro Elma); Fene, o 29 de xuño (19.00, Casa da Cultura); Oleiros, o 30 de xuño (20.30, Auditorio da Fábrica); Ribeira, o 2 de xullo (20.00, Salón de Actos do Conservatorio Municipal); e Rianxo, o 3 de xullo (22.00, no Auditorio Municipal).

Programa do Congreso A Memoria Diversa para o sábado 11

10.30. Presentación do libro “Memoria diversa”, de Eva Mejuto, a quen acompañará a deputada María Muíño.

11.00. Do que non se fala, non existe, con Nanina Santos Castroviejo, cofundadora da Asociación Galega da Muller (AGM) e integrante da revista Andaina.

11.30. E ademais, maricón, co escritor Lois Diéguez. Presenta e modera a escritora Eva Mejuto.

12.15. Maiores LGBT: A xeración silenciada, con Federico Armenteros, presidente da Fundación 26 diciembre, e Trinidad Falcés, activista LGBT, Premio Elisa e Marcela. Presenta e modera, Fito Ferreiro, da Asociación Palestra.

16.30. Os inicios do movemento LGBT galego, con Quique Costas, membro do Colectivo Gai de Compostela; Magolla Sande, promotora do Colectivo de Feministas Independentes de Santiago; Vicente Montoto, membro do Colectivo Gai de Compostela; e Xabier Mañón, membro do Colectivo Gai de Vigo. Presenta e modera: Bárbara Vilariño, de Les Coruña.

18.15. Os anos da SIDA, con Nacho Iglesias, traballador social e membro do Comité Galego AntiSIDA de Santiago. Presenta e modera: Xandre Garrido, da Asociación Avante LGBT+.

19.15. Concerto Transpirando, de O Rabelo.

Outros artigos

Boiro pecha de maneira preventiva a captación de auga de Cubelo

O Concello de Boiro tivo que cortar a captación de auga da zona de Cubelo ante a aparición dunha vaca morta nas inmediacións dun pequeno río que presta subministración á rede do municipio. Ao respecto o concello fixo pública esta tarde unha nota na que que indica que...

+

Publicidade

Revista en papel

Opinión

No son los ojos, son las miradas”. Manuel Dominguez

No son los ojos, son las miradas”. Manuel Dominguez

Pensamos, pensé, en la belleza de los ojos, hasta que un día cerca de casa, una pared me decía, ¡No, no son los ojos, son las miradas! Pensando en ello, cuánta razón, no son los ojos son las miradas, podemos ver en la película Los puentes de Madison, interpretada por...