Boiro acolle este sábado o Campionato Interprovincial de Baloncesto de XOGADE

Boiro acollerá este sábado día 21 o Campionato Interprovincial de Baloncesto de XOGADE (Xogos Galegos Deportivos en Idade Escolar). Organizado pola Agrupación Deportiva As Rias e o Clube Baloncesto Santa Baia (Boiro), contará coa participación de 13 equipos que representan as zonas de Ferrol, Vigo e Barbanza-Noia no que o dito clube boirense conseguiu representación en 3 das 4 categorías.

Segundo explican dende a entidade, na designación de Boiro como sede para acoller o evento foi determinante “o número de instalación das que dispón o municipio para a practica do deporte da canastra”. Proba disto é que no campionato van ser utilizadas catro instalacións, o Pavillón Municipal de A Cachada, o Pavillón Municipal de Barraña, o Pavillón do CEIP Santa María do Castro en Valiño e o Pavillón do CEIP Santa Baia. Unha vez rematados todos os encontros, os equipos participantes daranse cita as 18:30 na instalación que habitualmente utiliza a entidade boirense organizadora: o Pavillón do CEIP Santa Baia. Este foi o lugar elixido para a entrega de trofeos os campións interprovinciais e no que se contará coa presenza do rexedor local José Ramón Romero e da concelleira de Deporte, Dores Torrado.