Alfonso Rueda Valenzuela foi investido este xoves como o sexto presidente da Xunta grazas á maioría absoluta do Partido Popular e cos votos en contra da oposición. Deste xeito, Rueda releva a Alberto Núñez Feijóo tras a súa marcha para liderar o principal partido da oposición en España
Cunha traxectoria política como ‘número dous’ de Feijóo, o novo presidente galego recibiu os votos a favor do PP no Parlamento autonómico, incluído o do seu antecesor, que renunciará á acta nos próximos días e será designado senador pola Cámara autonómica.
O candidato asegurou que para que lle vaia ben a Galicia a Xunta necesita “o apoio e o empuxe” de todas as forzas políticas, polo que lles pediu tanto a PSdeG como a BNG que colaboren coas iniciativas que funcionaron e na posta en marcha doutras novas.
Na súa intervención, Rueda defendeu as baixadas de impostos propostas pola Xunta e animou aos grupos da oposición para practicalas no canto de ” ridiculizarlas”, como na súa opinión fan estes grupos tamén co Xacobeo, unha vía de ingresos e de promoción de Galicia sen igual, asegurou.
No Congreso extraordinario que o PPdeG prevé celebrar en Pontevedra os días 21 e 22 de maio, Alfonso Rueda converterase tamén no líder dos populares galegos e, conforme marcan os estatutos do partido, en candidato popular para 2024.
