O compoñente máis estritamente relixioso e litúrxico da Semana Santa en Rianxo terá un importante compoñente divulgador, dinamizador e turístico nos museos do concello, onde están programadas diversas actividades que teñen tamén unha importante vertente de conciliación familiar (achegando alternativas de lecer á rapazada no tempo de vacacións).
As actividades comezarán o luns 11, cunha visita guiada á aula Activa do Mar e proseguirán o mércores 13, ás 12.00 horas, co obradoiro sustentábel Crea o teu polbiño con material reciclado. Trátase dunha actividade para crianzas de cinco anos en adiante.
O Xoves Santo a partir do mediodía están previstas visitas guiadas á Casa Museo de Manuel Antonio e ao día seguinte, Venres Santo, haberá unha visita guiada ao Museo do Mar, tamén a partir das 12.00. O Sábado Santo, 16 de abril, retómase a mesma actividade na Casa Museo de Manuel Antonio e o Domingo de Resurrección, ás 12.00 horas, unha nova visita guiada ao Museo do Mar. Organiza o Concello de Rianxo. Para máis información cómpre chamar ao teléfono 698 148 569 ou escribir un correo a museomanuelantonio@concelloderianxo.gal.