Na Casa da Cultura da Pobra as imaxes gañadoras e finalistas do XV Premio Luís Ksado

A Casa da Cultura Raquel Fernández Soler acolle estes días, até o 19 de abril, unha nova exposición colectiva. Trátase das obras gañadoras e finalistas da décimo quinta edición do Premio Luís Ksado de Creación Fotográfica que promove a Deputación da Coruña. A concelleira da Cultura, Patricia Lojo (PSdeG-PSOE), destacou “a pluralidade estética, técnica e temática das instantáneas que compoñen esta convocatoria do Premio Luís Ksado, que se erixe como un referente no mundo da fotografía”.

Segundo engadiu, “as imaxes adscríbense a diferentes modalidades”. Na categoría de fotoxornalismo figuran a selección gañadora Atrapados ás portas de Europa, de José Manuel López, que reflicte a viaxe das persoas refuxiadas a través das montañas de Bosnia; e a finalista Tempos de pandemia, da autoría de Brais Lorenzo, que amosa a situación que estamos a vivir no ámbito mundial. En canto á fotografía documental, sitúanse os traballos finalistas Horizonte de area, de Javier Atienza, sobre o exilio do pobo saharauí; Morrer de soños, presentado por Clemente Bernard sobre a Guerra Civil; e Estrada descoñecida, de Jesús Caballero, que trata sobre a decadencia e o abandono.

E, no que respecta á fotografía de retrato, atópase Segunda pel, de Miguel Gómez Muñiz, que relaciona o ámbito profesional e privado das mulleres mariscadoras; e A esmorga, de Jesús Madriñán, quen achega o universo da mocidade de festa na madrugada.

As visitas pódense realizar de luns a venres, en horario de 11.00 a 13.30 e de 17.00 a 20.00 horas.