Este luns inaugúrase en Boiro unha exposición artística do alumnado de todos os centros do concello

Os centros de ensino de Primaria e Secundaria no municipio de Boiro inauguran este luns 4 de abril unha mostra de ilustración na Casa da Cultura. Os traballos que se expoñen están realizados polo alumnado durante o desenvolvemento duns obradoiros de ilustración impartidos por Rodrigo Chao. A iniciativa vén da man dos centros de ensino e máis da Concellería de Cultura de Boiro.

O obxectivo destas actividades, que se impartiron en todos os centros de Primaria e Secundaria do municipio, foi dar a coñecer ao alumnado o proceso creativo na elaboración dunha ilustración e incentivar o interese na lectura e asistencia ás bibliotecas. “Con eles os nenos e nenas puideron aprender a importancia do bosquexo, técnicas sinxelas de debuxo, composición, acabados…”, informou o Concello de Boiro, salientando que os traballos que agora se van expoñer son interpretacións artísticas a través de ilustracións do alumnado baseadas en libros.

A concelleira de Cultura, María Outeiral, asistirá o vindeiro luns ás 19.00 horas á inauguración da exposición que estará durante dúas semanas na Casa da Cultura de Boiro e que será itinerante polos demais centos municipais.