O Concello de Boiro presentou a súa programación cultural para os meses de outono, unha proposta que aposta polo teatro e o cinema como eixos principais. A concelleira de Cultura, María Outeiral, debullou as distintas actividades que se van levar a cabo nos meses de outubro, novembro e decembro.
O Centro Social de Abanqueiro acollerá nos vindeiros meses representacións teatrais para público adulto e tamén familiar, comezando coa representación teatral Contos entre cordas de María da Pontragha este venres 2 de setembro ás 21.00 horas.
Os espectáculos serán os venres e sábados e as entradas poderanse conseguir na billeteira dende unha hora antes da función.
Outra das propostas culturais que volve no outono é o Ciclo de Cine Mestre Mateo. Todos os domingos de outubro e novembro ás 19.00 horas no Centro Social de Boiro haberá cine, comezando este domingo día 4 coa proxección do documental Mary Quintero. 90 anos de creatividade. Todas as proxeccións serán de balde.
O outono cultural de Boiro inclúe tamén outras propostas como o concerto deste sábado día 3, unha actividade da Deputación da Coruña. Trátase dun espectáculo do músico mozambiqueño Cheny Wa Gune, un artista africano participante no Festival Maré, referente de músicas do mundo. Será ás 21.00 horas no Pazo de Goiáns.
“Logo dun verán de moita actividade cultural continuamos cun outono con propostas máis sosegadas pero pensadas para os distintos públicos”, recoñeceu a concelleira María Outeiral.
Axenda de actividades
Teatro – Centro Social de Abanqueiro
Venres 2 de outubro, 21.00h | Contos entre cordas Maria da Pontragha
Venres 9 de outubro, 21.00h | Melón pelado Butacazero
Venres 23 de outubro, 21.00h | De ida e volta Cris de Caldas e Amor Herrera
Venres 30 de outubro, 21.00h | Un Deus salvaxe Talía Teatro
Venres 6 de novembro, 20.00h | Coralinda Elefante Elegante
Venres 13 de novembro, 20.00h | ComedIA Píscore
Venres 20 de novembro, 20.00h | As peripecias de Xurxo Malasombra producións
Venres 27 de novembro, 20.00h | TIN Dani García
Venres 4 de decembro, 20.00h | Onde viven os monstros Carmen Domenech
Venres 11 de decembro, 20.00h | Chegar e encher Bea Campos
Cine – Centro Social de Boiro
Domingo 4 de outubro, 19.00h | Mary Quintero. 90 anos de creatividade
Domingo 11 de outubro, 19.00h | Antes de nós
Domingo 18 de outubro, 19.00h | 360 curvas
Domingo 25 de outubro, 19.00h | Sirat
Domingo 8 de novembro, 19.00h | Deuses de pedra
Domingo 15 de novembro, 19.00h | As liñas discontinuas
Domingo 22 de novembro, 19.00h | Ao son da nova regueifa
Domingo 29 de novembro, 19.00h | O silencio herdado
