CONGALSA comprométese con levar a alimentación saudábel ás nosas casas a través da fórmula Nowtural

CONGALSA vén de compartir detalles sobre unha das súas grandes apostas en materia de alimentación saudábel: o selo Nowtural, definido pola empresa pobrense de produtos do mar como “unha maneira de coidarnos fácil e respectuosa co medio ambiente”. Trátase, máis en detalle, dunha gama de produtos deseñada para facilitar o consumo das 3-4 racións de peixe semanais recomendadas polos expertos en nutrición.

Nowtural propón unha axenda alimentaria semanal formada por tres pratos de peixe con guarnicións sas e equilibradas e tres hamburguesas aderezadas con “ingredientes orixinais e sorprendentes”, salientan fontes da empresa con sede principal no Polígono da Tomada, engadindo que se trata de “receitas cen por cen naturais e libres de aditivos, especialmente deseñadas para cumprir cos criterios nutricionais fixados polas autoridades en referencia á inxesta diaria de sal e graxas; son pratos perfectos para confeccionar unha dieta rica en proteína de alto valor biolóxico, baixa en graxas saturadas e fonte de vitaminas e minerais esenciais para o bo funcionamento do noso organismo”.

Ademais, a proposta de valor que CONGALSA quere trasladar con Nowtural non se cingue só á alimentación saudábel senón que fai fincapé no compromiso da empresa coa sustentabilidade; de feito Nowtural utiliza materias primas certificadas MSC, procedentes de pesqueiras sustentábeis, e preséntase nun packaging cen por cen libre de plástico que combina materiais reciclábeis e aptos para compost. Julio Simarro, director de Mercadotecnia e Vendas de CONGALSA, defínea como ”unha proposta diferencial e esixente, pensada para conectar coas necesidades e preocupacións do consumidor actual”.

Produtos finalistas dos Excellence Global Awards

CONGALSA confirmou tamén que volverá á feira Seafood Expo Global que este mes de abril celebrarase en Barcelona do 26 ao 28, presentando un portfolio consolidado de referencias tanto para o sector da hostalería e a gastronomía como para o retail. Entre eles destacará Nowtural, cuxos produtos foron seleccionados como finalistas dos Seafood Excellence Global Awards, que recoñecen as mellores contribucións do sector a nivel internacional, valorando aspectos como a innovación, a conveniencia, a saúde e a nutrición, o packaging e a gama de produtos.