Até 150 corredores de 27 clubs participarán esta fin na volta ciclista ao Barbanza (A Orixe)

Barbanza Arousa presentou este 5 de abril os detalles da primeira edición da proba ciclista Challenge Volta o Barbanza A Orixe, que organiza o Club Ciclista Barbanza co patrocinio da mancomunidade dos nosos concellos (Ribeira, A Pobra do Caramiñal, Boiro e Rianxo) e que está prevista para os días 9 e 10 de abril en dúas etapas que percorrerán os catro municipios da vertente norte da ría de Arousa.

Na presentación da proba, celebrada en Boiro, participaron o presidente da mancomunidade, Xosé Lois Piñeiro; o membro da directiva do Club Ciclista Barbanza, José Ramón Torrado; e o secretario da Federación Galega de Ciclismo, David Carrillo.

Segundo fixeron saber, no evento deportivo van participar máis de 150 corredores de 27 clubs galegos, de toda a xeografía española e tamén portugueses. O secretario da Federación Galega de Ciclismo, David Carrillo, convidou a todas as persoas a que se acheguen a ver a proba por ser un “moi bo espectáculo que axuda a fomentar a base no deporte”.

Por parte do club agradeceron o apoio da Mancomunidade Barbanza Arousa para “poder levar a cabo unha proba como esta que acolle a corredores de todo o territorio e que se realiza en todos os municipios”.

Na presentación fixeron saber que o evento vai abranguer dúas etapas. A primeira o sábado 9 de abril con saída e chegada en Boiro e que discorre tamén por Rianxo de 97 quilómetros. A segunda etapa, de 86 quilómetros, será o domingo día 10 e con saída e chegada na Pobra e que pasará por Ribeira.

O presidente da Mancomunidade, o alcalde pobrense Xosé Lois Piñeiro, anunciou que “esta proba segue o mesmo camiño que outras iniciativas que comezan nun municipio e se desenvolven a nivel comarcal”. Segundo confirmou, a entidade de concellos entende que “a promoción do deporte e a promoción da comarca van ligadas” e que “a celebración de actividades como esta redunda no beneficio de todos os concellos xa que as persoas participantes poden coñecer a nosa paisaxe”.