A Asociación Ambar, colectivo da nosa comarca centrado en traballar pola inclusión das persoas con diversidades funcionais, abriu as inscricións para a segunda edición de A Tribo do Autocoidado, unha iniciativa dirixida ás mulleres do Barbanza que queiran reactivar as súas ferramentas para o apoderamento, o autocoidado e o afrontamento do estrés “cunha perspectiva de amabilidade e respecto”.
Con este servizo quérese chegar á poboación feminina dos nosos concellos que non teña formación regulada, poñendo o foco especialmente naquelas que teñan fillas ou fillos ao cargo. O obxectivo é achegarlles cinco sesións de 3 horas a través das cales exercitarán as habilidades para a práctica do autocoidado, desenvolverán o sentido de pertenza e apoio mutuo, e as súas habilidades comunicativas para expresar necesidades e intereses propios.
Os obradoiros grupais serán de 10 persoas máximo por grupo, desenvolveranse na Casa da Cultura de Palmeira os mércores 27 de abril, 4, 11 e 18 de maio de 16:30 a 19:30h. E no Centro Social de Boiro os martes 3, 10, 24, 31 de maio de 16:30 a 19:30h. Serán impartidos por Mª Carmen González, psicóloga na Asociación Ambar, experta en psicoloxía de emerxencias, membro do Grupo de Intervención Psicolóxica en Catástrofes e Emerxencias e integrante do equipo fundador do Espazo de Autocoidado do COPG.
As inscricións xa están abertas chamando ó 981 87 44 80 ou na web de Ambar. As persoas interesadas teñen para inscribirse no grupo de Palmeira ata o 25 deste mes e no de Boiro ata o día 29. Esta actividade é totalmente gratuíta e está financiada pola Secretaría Xeral da Igualdade e o Fondo Social Europeo.