O BNG esixe máis inspeccións e sancións para as empresas que contaminan as rías

A portavoz de Pesca do BNG, a pobrense Rosana Pérez, advertiu este martes 15 de marzo da “gran afectación sobre o marisco” derivada das verteduras contaminantes na rías galegas das que son culpábeis unha chea de empresas, sobre todo na ría de Arousa, e reclamou “medidas urxentes destinadas a corrixir esta situación”.

A deputada lembrou que hai sete meses o BNG rexistraba no Parlamento galego unha batería de iniciativas referidas á denuncia presentada pola Fiscalía de Medio Ambiente da Coruña no Xulgado de Instrución de Ribeira contra a empresa conserveira JEALSA por supostas verteduras á ría de Arousa. A portavoz de Pesca da agrupación nacionalista dixo que en xaneiro “foi detectada unha nova vertedura na zona do Bodión (Boiro) da dita conserveira e que provocou, máis unha vez, unha cantidade de marisco morto que se conta por toneladas”, afirmou.

Pérez preguntou ademais “se Augas de Galiza ten constancia de que as sancións serven para algo cando continúan a producirse vertidos contaminantes nas rías”. Ademais das sancións, dixo, “é necesario que as empresas sexan apercibidas para que modifiquen unha actuación incorrecta e que non se volvan a producir este tipo de verteduras”.

A deputada recalcou que existen “poucas sancións e inspeccións” como confirma a propia Fiscalía de Medio Ambiente na súa denuncia cando afirma que non consta un  “seguimento axeitado” nin “o exercicio de maneira adecuada da potestade sancionadora da Administración”.

Ao seu xuízo, a Xunta de Galiza, “diante das reiteradas verteduras ao longo dos anos na zona do Bodión, vén sistematicamente mirando para outro lado e facendo caso omiso dos feitos e  consecuencias e evitando actuar de oficio ou arquivando todos os expedientes, agás un, incoado por Augas”.

Rosana Pérez insistiu en que “tampouco existen por parte do Goberno advertencias á empresas para que isto non volva a ocorrer”.