Este venres 18 a rapazada de Boiro poderá desfrutar co novo espectáculo de Teatro Calavera

Este venres 18 de marzo a Casa da Cultura de Boiro vai acoller o espectáculo Palma repalma, de Teatro Calavera. Será ás 20.00 horas, con posibilidade de adquirir entradas no mesmo día da función a partir das 19.00 horas. Trátase dun espectáculo teatral e de maxia para público infantil e familiar.

Palma repalma, ademais dunha canción, é a fórmula máxica e o inicio desta historia que recala en Boiro da man de Teatro Calavera. Trátase dun espectáculo enmarcado nun souto (un bosque de castiñeiros) encantado onde viven animais e algúns seres máxicos, coma os protagonistas desta historia. Haberá xogos, cancións, ditos tradicionais das nosas avoas, xogos musicais, teatro, maxia, monicreques e fábulas. Os protagonistas do espectáculo son un trasgo e unha trasga que nos achegan ás nosas raíces e ábrennos as portas da súa casa, un souto vello cargado de amor e cultura.