Escurís, a marca de conservas premium da boirense JEALSA, é este ano a patrocinadora oficial do desfile de Pertegaz, a firma de moda española fundada por Manuel Pertegaz, este xoves 10 de marzo durante a celebración da 75ª edición da Mercedes-Benz Fashion Week Madrid.
En palabras de Silvia Losa, directora internacional de Pertegaz, “é un pracer contar cun patrocinador como Escurís para homenaxear á moda española nunha cita tan importante. O coidado pola artesanía e a visión innovadora son dúas características que comparten ambas as marcas, polo que estamos moi felices por esta colaboración”.
Pola súa banda, Sandra Alvarellos, directora de Mercadotecnia & eCommerce de JEALSA, engade que “Pertegaz é unha marca icónica e de referencia na moda española, cunha longa historia na nosa sociedade e que soubo reinventarse ao longo dos anos sen perder a súa esencia. Estes son os mesmos valores que comparte Escurís, por iso para nós ten todo o sentido que ambas as marcas compartan escenario nunha ocasión tan especial”.
Así, para celebrar a alianza destas dúas marcas de referencia no sector da gastronomía e da moda, Escurís ofrece aos asistentes da kissing room de Pertegaz un catering no que as conservas serán as protagonistas, “cun concepto fresco, moderno e exquisito”, deseñado especialmente para esta ocasión.
O menú foi elaborado en colaboración con The Good Food Company, catering español liderado polas chefs Patricia Parra e Catalina García-Germán, formadas na escola Lle Cordon Bleu de Madrid e Parísm respectivamente, e que, segundo lembran fontes da conserveira galega, “destacan pola súa creatividade e polo coidado das materias primas nas súas elaboracións”.
Ademais, desde as redes sociais de Escurís sorteouse un convite dobre para vivir de primeira man o desfile de Pertegaz e ser testemuña da próxima colección da firma española.
Escurís e Pertegaz: dúas historias de superación e éxito
A historia de Escurís remóntase a 1939 cando Manuel Escurís López, empresario de Taragoña (Rianxo) sen experiencia previa no sector conserveiro, descubriu na Pobra do Caramiñal (A Coruña) a contorna idónea para a fabricación de conservas de peixe. Desde entón, a tradición á hora de recoller e tratar cada materia prima, e a forma artesanal de elaborar cada conserva impulsaron á compañía a ser na actualidade un referente en canto a calidade e prestixio.
Pola súa banda, o recoñecido deseñador Manuel Pertegaz abriu o seu primeiro taller en Barcelona en 1942. Tras recibir o Óscar de Alta Costura pola Universidade de Harvard e declinar converterse no sucesor de Christian Dior para enfocarse na súa propia marca, Pertegaz consegue forxar o seu éxito a nivel mundial. Logo do seu falecemento en 2014, a empresa boirense JEALFER adquire os dereitos das coleccións de Pertegaz Pret-a Couture coa ambición de continuar a traxectoria de Manuel Pertegaz e honrar a súa visión e valores. En 2019, o deseñador español Jorge Vázquez é nomeado novo director creativo da compañía iniciando así unha nova época de éxito e recoñecemento na moda a nivel mundial.