A Asociación Cultural Barbantia, a editorial Cumio, La Voz de Galicia e o Concello da Pobra organizan este venres 25 de marzo a presentación literaria do libro de Montse Fajardo, A vida incerta. Biografía de Virxinia Pereira. A cita será este venres ás 20.30 horas no auditorio do Museo Valle-Inclán da Pobra do Caramiñal. Intervirán Montse Fajardo (autora), Patricia Lojo (concelleira de Cultura da Pobra), Xerardo Agrafoxo (Asociación Cultural Barbantia) e Xosé Lois Piñeiro (alcalde da Pobra). A entrada será libre até completar a cabida da sala. Aproveitarase para dar a coñecer o número 173 do suplemento cultural A Voz de Barbantia, que sairá do prelo un día despois, o sábado 26 de marzo, con La Voz de Galicia.
Virxinia Pereira
A vida incerta é como dixemos a biografía de Virxinia Pereira, a dona de Alfonso Daniel Rodríguez Castelao e, antes que nada, unha muller con presenza de seu que foi unha das grandes valedoras da cultura galega na primeira metade do século XX e, en palabras de Montse Fajardo, “unha muller que non asumiu o papel conformista de esposa resignada e dócil á sorte do seu compañeiro. Lonxe diso acometeu unha participación activa en gran número de actos e manifestacións públicas nos que lle era dado intervir. Así foi durante a vida de Castelao e logo de morto”. O libro de Montse Fajardo contén material bibliográfico, fotografías de Castelao e de Virxinia, fragmentos de cartas que compartía con pensadores da época, como Otero Pedrayo ou Valentín Paz Andrade, e incluso ilustracións que Castelao realiza dela.
Ficha técnica
Título: A vida incerta. Biografía de Virxinia Pereira
Autora: Montse Fajardo
Ano de publicación: 2020
Edita: Concello de Pontevedra
Número de páxinas: 309
