Alumnado do CEIP Plurilingüe de Artes coñeceu os recursos marisqueiros da Pobra

Unha trintena de alumnos e alumnas do CEIP Plurilingüe de Artes (Ribeira) achegouse á Pobra do Caramiñal para participar nun dos obradoiros mariñeiros dirixidos a centros educativos. A actividade desenvolveuse o 17 de marzo da man da Concellaría do Turismo, da cal é titular a edil Charo Varela (Nós Pobra), en colaboración coa Asociación Mar da Pobra.

As nenas e nenos desprazáronse ata a praia dos Raposiños, onde foron recibidos por unha das técnicas do Turismo do Concello, quen lles explicou a actividade para logo mostrar, da man das propias mariscadoras, os bivalvos que atesouran os areais da localidade e os aparellos que se empregan para a súa extracción.

A finalidade destas visitas-experiencia é achegarlles ás xeracións máis novas o oficio das mariscadores e fomenta-lo respecto polo mar, polo traballo neste eido e polo medio natural, ao tempo que se contribúe con esta acción á desestacionalización da demanda turística.

A dita iniciativa dirixida a centros de ensinanza de toda Galicia continuará nos vindeiros meses.