Finalmente o Pavillón Municipal de Deportes de Rianxo pasará a chamarse José Manuel Abuín-Chema, en homenaxe ao traballador municipal que desempeñou o seu traballo no Concello durante 36 anos, sendo adscrito ao Pavillón no 1993 e do que foi conserxe durante 26 anos, “representando uns valores de entrega ao deporte que o fixeron merecente desta honra”, segundo destacaron fontes do Consistorio dende as redes sociais. Esta homenaxe será posíbel grazas a unha iniciativa lanzada desde o Club de Voleibol de Rianxo, o Departamento de Deportes e Rianxo en Común, á que se sumaron por unanimidade todos os partidos políticos do Concello. O nome oficializarase no pleno deste xoves.
O Concello lembra que “no momento do seu pasamento en 2020 era o traballador mais antigo do Servizo de Deportes, formando parte do mesmo case desde a súa creación. O seu compromiso co traballo e o deporte levárono a estender as súas labores mais alá das súas obrigas na conserxería, colaborando na actividades municipais como árbitro, axudante de monitor, auxiliar na organización de eventos, operario de mantemento…”. Foi, en palabras de todos colectivos e entidades que impulsaron este tributo, “un exemplo de esforzo, compromiso e entrega profesional e persoal, que nos seus anos de traballo no Pavillón atendeu a varias xeracións de rianxeiros, milleiros de persoas que asistían ás actividades municipais, aos eventos deportivos, que formaban parte dos clubs e dos colexios do Concello e aos que sempre estaba disposto a axudar”.
