O Concello de Boiro celebra o Entroido 2022 con festas infantís, concurso de disfraces e un tren para os enterros

A Concellería de Cultura do Concello de Boiro organiza un programa de actividades para todos os públicos para festexar o Entroido 2022. O programa inclúe o tradicional concurso de carrozas e disfraces e tamén actividades para os nenos e nenas.

As actividades do programa de Entroido comezan este venres día 25 de febreiro cunha festa infantil e familiar de disfraces, que será ás 17.00 horas na praza de Galicia. O domingo día 27 celébrase o desfile infantil de disfraces que sairá ás 17.00 horas da praza da Mancomunidade e sesión DJ e animación na praza de Galicia.

O día 1 de marzo, martes de Entroido, celébrase o tradicional concurso de disfraces e carrozas. A saída será ás 18.00 horas da praza de Galicia e vai percorrer as rúas do casco urbano. As inscricións para o concurso están xa abertas e as bases e toda a información na web municipal, www.boiro.gal.

A programación de entroido continúa o domingo día 6 de marzo co Tren dos Enterros. O Concello de Boiro habilita un tren para percorrer os catro enterros que ese día se celebran no municipio. Comeza ás 12.00h en Cabo de Cruz para facer un percorrido para o enterro do Farruco; ás 13.30h chegará a Praia Xardín para o enterro da Cunca; ás 16.00h irá a Abanqueiro para o Enterro do Óso; e ás 17.30h irá Escarabote para o Enterro do Felipiño.