Sen alento. Así están as vilas de Marín, Cangas, Bueu e Moaña, sacudidas desde primeiras horas da mañá deste martes pola triste nova do naufraxio do pesqueiro galego Villa de Pitanxo, acontecido a 250 millas da costa de Terranova, illa tan coñecida e referente para os mariñeiros galegos que faenan en augas canadenses controladas pola NAFO.
O mesmo acontece, ben seguro, nas Illas Canarias, en Huelva, en Perú e no país africano de Ghana, de onde son tamén algúns dos tripulantes dese barco.
Aínda non se determinaron as causas do afundimento do conxelador do marinense grupo Nores, do que se recibiron dous sinais de alerta a partir das 5,24 horas da mañá deste martes negro, 15 de febreiro de 2022. O sinal da caixa azul do buque perdeuse pouco antes das 6 da mañá, que foi cando se mobilizaron barcos e helicópteros por parte do Salvamento Marítimo canadense, aos que se engadiron outros medios aéreos e marítimos durante todo o día. Uns e outros centraron a súa atención no punto indicado pola posición da radiobaliza e caixa azul do conxelador sinistrado.
O Villa de Pintanxo, de 50 metros de eslora e moi poucos anos de servizo, afundiu sen que, ata o momento, ninguén poida determinar as causas. A bordo, 24 tripulantes, dos que ata o de agora foron rescatados tres con vida; 7 mortos, e os catorce restantes, desaparecidos. É esta a traxedia máis grande rexistrada nos últimos decenios por un barco galego.
A tripulación estaba integrada por 16 españois (6 deles nacionalizados, procedentes de Perú e Ghana). Dos españois, 3 son de Cangas e outros 3 de Marín, e os catro restantes, de Moaña. Bueu, Canarias (un observador do IEO) e Huelva.
Pouco despois das 5 da mañá perdeuse o contacto co barco e comezou o sinal de alerta emitido polas radiobalizas. Tras a mobilización de barcos e helicópteros, foron localizadas catro balsas salvavidas, dúas delas valeiras, sen tripulación. Na terceira foron avistados os corpos de tres sobreviventes, axiña trasladados a lugar seguro.
Oficialmente foron recuperados 7 cadáveres e tres sobreviventes. Os barcos na zona -entre estes o galego Playa Menduiña Dos, con base en Marín, e o portugués Novo Virgem da Barca, aos que se sumou máis tarde outro pesqueiro do grupo Nores. Os catro primeiros cadáveres foron recollidos a bordo dunha das catro balsas salvavidas localizadas pola mañá. O Playa de Menduiña Dos recuperou do mar outros dous tripulantes mortos, e os servizos de rescate outro. En total, os xa citados 7 mariñeiros falecidos.
A temperatura na zona era de 5 graos baixo cero, mar con ondas de 4 a 5 metros, e forte vento.
Toda Galicia, todos os galegos, láianse desta nova traxedia no mar. Só queda o consolo de que se recuperen os corpos dos desaparecidos, tarefa ben pouco doada polas malas condicións climatolóxicas e a escasa visibilidade reinante.
