Amicos celebrou este xoves 24 de febreiro o seu Entroido. Fíxoo , no centro de Comoxo, en Boiro, cunha gran festa de disfraces, doces típicos, desfiles, creatividade a esgalla e boa música. O evento foi a culminación de semanas de intenso traballo, nas que as persoas integrantes da asociación implicáronse ao máximo en ambientar o centro coa decoración típica destas datas. A maiores, fixeron un esforzo especial para acadar un resultado impecábel nos seus disfraces, tal e como se pode comprobar nas imaxes que compartiu Amicos. O traballo desenvolveuse nas dúas grandes sedes de Amicos na nosa comarca, a de Comoxo e a de Oleiros.
No caso do centro de Oleiros, optouse pola temática circense, con leóns, domadores, magos, coellos, pallasos, mimos e malabaristas para celebrar o tradicional Entroido. A xornada estivo chea de xogos, bailes e ata un karaoke.
No centro de Comoxo as persoas usuarias de Amicos comezaron a mañá deste xoves preparando a súa maquillaxe e dando os últimos toques aos seus disfraces para estar todo a punto para o gran momento. Todo acompañado de música e o ambiente festivo.
As dúas liñas de traballo confluíron nunha gran festa ao aire libre que mitigou o illamento e o distanciamento da pandemia, que obrigou ao desenvolvemento de actividades por separado. Todos os Amicos, xa preparados cos seus mellores disfraces e a máis elaborada maquillaxe, empezaron a desfilar.
Os integrantes do Centro de Día foron os primeiros en pisar o escenario e puideron verse disfraces de hawaianos e hawaianas, coches de choque, e os Tanxuamicos coa estética inspirada no famoso grupo galego Tanxugueiras. Logo foi a quenda das persoas que forman parte do equipo de Fábrica Social e, nesta ocasión, disfrazáronse de sanitarios, tests anticovid e o propio virus. As persoas que forman parte do Fogar Amicos disfrazáronse baixo dúas temáticas: o mundo submarino e os superheroes.
