A Deputación abre o prazo de solicitudes das bolsas de deportistas

A Deputación da Coruña, no seu labor de promoción apoio ao deporte da provincia, convocou 45 bolsas de 3.500 euros cada unha destinadas a deportistas da provincia que destaquen en competicións federadas a nivel autonómico, nacional e internacional. O prazo de solicitudes abre mañá mércores e remata o 18 de marzo ás 14.00 horas.

A deputada de Deportes, Cristina Capelán, informou de que neste 2022 a Deputación destina un orzamento de 157.500 euros a esta liña de subvencións, que pretende “recoñecer o esforzo das nosas e os nosos deportistas e axudarlles a que poidan ter a mellor preparación para que sigan colleitando éxitos para o deporte coruñés nas diferentes disciplinas deportivas”.

Entre os bolseiros da Deputación en 2021 destacan referentes do deporte coruñés como a atleta ribeirense Ana Peleteiro (medalla de bronce nos Xogos Olímpicos de Tokio), o piragüista betanceiro Carlos Arévalo (medalla de prata), o remeiro noiés Caetano Horta, Alberto Gaitero (judo), Daniel Castro (tiro con arco) ou Belén Toimil (lanzamento de peso).

Podemos consultar os detalles da convocatoria no BOP.