Recala en Rianxo a mostra da Deputación que homenaxea a Carvalho Calero

A exposición da Deputación da Coruña para conmemorar a figura do Ricardo Carvalho Calero, escritor homenaxeado en 2020 no Día das Letras Galegas, poderá verse en Rianxo, na praza da Manuela (paseo da Ribeira), até o 6 de febreiro.

A mostra percorre a vida e a traxectoria creativa do autor ferrolán, máximo representante do reintegracionismo (a corrente lingüística, cultural, social e política que reivindica a raizame común do galego e o portugués, avogando pola integración).

Trátase da mostra coa que o ente provincial homenaxea o autor ao que no ano 2020 se lle dedicou o Día das Letras Galegas e cuxa celebración quedara “desdebuxada” por mor da irrupción da pandemia e as restricións que implicou.

A exposición, a través de trece expositores permite percorrer outras tantas etapas da vida de Carvalho Calero, facendo especial fincapé no legado do autor ao que o pasado ano se lle dedicou o Día das Letras Galegas. Así, nestes trece paneis pódese visitar a traxectoria vital e profesional do autor, desde o seu nacemento en Ferrol até o peche co titulado Mestre de Compromisos onde se fai mención ás distintas homenaxes que recibiu antes do seu falecemento e, asemade, recóllese unha imaxe do alumnado da primeira promoción de Filoloxía Galego-Portuguesa da que foi profesor.

A mostra, concibida desde a filosofía da itinerancia co obxectivo de chegar a diferentes puntos da provincia, iniciara o percorrido en Ferrol por ser o lugar de nacemento do propio Ricardo Carvalho Calero. Tralo seu paso por Ribeira ao remate do verán viaxou ata Betanzos para trasladarse posteriormente a Sada, Melide e Rianxo.