O voceiro de Marisqueo do Grupo Socialista, Julio Torrado, propuxo este 18 de xaneiro abordar “unha estratexia conxunta a longo prazo” e “con carácter permanente” para salvar a produción da ría de Arousa. A proposición non de lei socialista, presentada na Comisión de Pesca do Parlamento, foi rexeitada polo PP.
Segundo informou, “os datos evidencian que a situación na ría de Arousa está peor que hai uns meses”, alertando de que a “acción política” da Xunta “non está funcionando” porque “dende a Xunta están a burocratizar o sistema” e “pretenden recuperar unha ría pasando papeis dende un despacho en Santiago”.
O vicevoceiro socialista lamentou o que considera un exemplo de “inacción” por parte do Goberno galego, e engadiu “que cando Feijóo accedeu ao Executivo hai 12 anos existían máis de 6.400 permisos marisqueiros e, entón prometeron acadar os 8.000, pero agora estamos en menos de 4.000”. E engadiu: “A tendencia evidencia que estamos caendo en termos globais e non só en termos puntuais, polo que estamos nunha situación grave para un sector vital para Arousa”.
Torrado instou ao Goberno galego a “abrir unha mesa de traballo” que permita a todos os axentes implicados traballar nunha “proposta en positivo” e “poñendo todos os esforzos no mesmo sentido”; así como a “poñer fondos” para afrontar unha “política transformadora” porque “de nada vale falar sobre isto se o sector queda sen ferramentas”.