O BNG ribeirense emitiu un comunicado para valorar positivamente que se atenda a súa proposta de instalar enerxías renovables para abaratar o recibo do saneamento.
Desde o Bloque argumentan que malia que a formación sempre se opuxo a este modelo de saneamento, aprobado unilateralmente polo Partido Popular por ser caro e ineficiente, foi o único grupo que presentou alegacións e propostas alternativas. A instalación de enerxía renovable para reducirlle a tarifa á veciñanza, fora unha medida presentada en xaneiro de 2020 cando se debateu a xestión da depuradora.
O concelleiro do BNG, Luís Pérez Barral, esgrimiu que “hai fondos suficientes para facer rebaixas importantes pero o goberno local prefire facer caixa cunhas taxas e impostos, claramente abusivos, que lle cobra á veciñanza neste momento de crise económica”. Barral votou man dos datos para explicar os motivos que levan ao Bloque a propoñer rebaixas e bonificacións importantes. Detallou que o Concello de Ribeira vaille cobrar á veciñanza 4.650.000 euros en concepto de auga, saneamento, lixo e sumidoiros mentres, outras taxas e impostos que non lle afectan á veciñanza, se manteñen en niveis mínimos como por exemplo a que grava o uso de terreo público por parte das compañías eléctricas e telefónicas da que só se prevé ingresar 265.000 euros.
Así pois, desde o BNG consideran que a cidadanía non debe pagar as malas decisións adoptadas polo PP cando escolleu o actual modelo de depuración caro e ineficiente. Propoñen reducir un 20% a taxa de saneamento e depuración por ser “tarifazo abusivo” e formulan incrementar a bonificación a colectivos vulnerables.
Tamén se refiren á subministración de auga potable e propón crear unha bonificación dun 30% para familias numerosas e establecer o consumo por tramos (reducido, medio e xeral) para fomentar que aquelas persoas que reduzan o consumo de auga poidan pagar menos. “Aprobar esta medida premiaría aqueles fogares que reduzan o seu consumo de auga” asegura Pérez Barral.
