Maraiva Sentir Natural doará a Amicos 0,50 euros por cada venda de auga Micelar Solidaria

14 Xaneiro 2022

A Asociación Amicos formalizou este 14 de xaneiro un acordo de colaboración con Mariña Bua González, representante de Maraiva Sentir Natural. En virtude desta alianza, a empresa de cosmética natural galega doará directamente á asociación da nosa comarca 0,50 euros por cada unidade vendida de Auga Micelar Solidaria.

Mariña Bua González destacou: “Para nós é moi importante o labor de Amicos, tanto polo seu espírito de solidaridade, como pola sustentabilidade da que fan gala, unha cuestión que é fundamental para nós”, tal e como se pon de manifesto na aposta da marca por materiais reciclados cos que elaborar os seus produtos e colaborar con asociacións que comparten a mesma filosofía.

Maraiva Sentir Natural é unha firma de cosmética natural que combina materias primas con tradición en Galicia e con outros ingredientes naturais estrelas no coidado persoal. A súa finalidade é compartir os tesouros naturais galegos, así como o fomento dun comercio ético e local en favor do medio ambiente.

Miguel Beiro, responsábel da área de Emprego e Empresas de Amicos, declarou que con este acordo “ábrese unha etapa moi interesante de colaboración, pois sempre tivemos como obxectivo conseguir que un produto fose solidario con Amicos”. E engadiu: “Para nós encaixa perfectamente na nosa liña de traballo sustentábel e de posta en valor dos produtos de proximidade, así como nos esforzos que facemos para contribuír á mellora da calidade de vida das persoas con grandes necesidades de apoio”.

A finalidade da colaboración é sumar esforzos para establecer camiños de actuación que favorezan a integración das persoas con discapacidade.

A Auga Micelar Solidaria de Maraiva Sentir Natural pódese adquirir a través da web maraiva.com ou a través de diferentes puntos da provincia de A Coruña e Pontevedra.

Outros artigos

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...