O material promocional (merchandising) do Camiño de Santiago A Orixe (deseñado polo sobranceiro artista da nosa comarca Manuel Ayaso, quen vén de ser nomeado Fillo Predilecto de Ribeira, e confeccionado polo negocio local Laguerzza), vén de abrir o seu primeiro punto de venta fóra da contorna do Barbanza. Concretamente, fíxoo no Mercado da Pedra en Vigo.
Así, alí pódense mercar distintos elementos coas imaxes identificativas da ruta xacobea que arranca no Faro de Corrubedo, tales como suadoiros, bolsos, cuncas ou camisetas.
Deste xeito, proséguense os labores de promoción dun camiño que na semana pasada recalou en FITUR da man da Mancomunidade Barbanza Arousa.
A previsión é abrir máis puntos de venta noutros puntos da xeografía galega nos próximos meses: un obxectivo no que existen xa varias propostas que se están a avaliar.
