O Concello de Boiro, mediante a área de Cultura, habilitou un autobús para asistir á representación O lago dos cisnes de Tchaikovsky producida por Royal Russian Ballet. O obxectivo desta actividade é “colaborar coas entidades culturais do municipio para facilitar e promover o acceso a espectáculos de danza profesionais”, en palabras do Concello.
A representación é o xoves 20 de xaneiro ás 20.30 horas no Palacio de Congresos e Exposicións de Galicia e a entrada corre a cargo das persoas interesadas.
O Concello de Boiro habilita o autobús, que será totalmente gratuíto para todas aquelas persoas que queiran asistir, sairá ás 19.00 horas da parada da Cachada e regresará unha vez remate a función.
O prazo de inscrición para as prazas do autobús está aberto dende este martes día 4 de xaneiro e ata o vindeiro martes día 11. As inscricións deben facerse cubrindo o formulario web dispoñíbel en www.boiro.gal.
