Comezaron os traballos para construír unha rotonda na contorna do Faro de Corrubedo

A contorna do Faro de Corrubedo acolle dende esta semana os traballos dirixidos á habilitación dunha rotonda. Trátase dunha iniciativa da Consellería de Infraestruturas, destinada a “mellorar o regulamento do tráfico” e “facer posíbel o cambio de sentido en condicións seguras”. A infraestrutura é o paso previo á formalización do traspaso ao Concello de Ribeira da estrada AC-303 entre o devandito punto e Laxe da Gata no acceso a esta parroquia.

A nova infraestrutura, situada no punto quilométrico 8+140, sitúase desprazada á parte esquerda da vía tal e como se aprecia no plano inferior e ten un radio de once metros. Está previsto que ao seu carón sexa acondicionada unha parcela para prazas de estacionamento.

Ademais, o Concello lembra que o seu Plan de Turismo Sustentábel 2022-2022 consigna unha partida de 100.000 euros de fondos Next Generation para a humanización dos espazos exteriores do Faro de Corrubedo.