A Deputación da Coruña vén de anunciar que destina 550.000 euros a financiar o traballo dos concellos en materia de promoción e uso do galego. Deste xeito, abriu o prazo para que as administracións locais soliciten as subvencións para garantir a presenza de persoal técnico especializado en normalización lingüística no ano 2022.
As axudas diríxense a concellos, agrupacións de municipios, mancomunidades e outras entidades locais da provincia. Como dixemos, a Deputación, a través da área de Normalización Lingüística, destina un total de 550.000 euros, dos que cada beneficiario poderá recibir un importe máximo de 15.000.
Poderán participar todos os concellos da provincia de 5.000 ou máis habitantes ou agrupacións de concellos e mancomunidades que, entre eles, cheguen a esa cifra mínima de residentes.
En 2021, un total de 46 concellos contaron con persoal técnico especializado para a promoción do galego a través da liña de axudas da área de Normalización Lingüística da Deputación, departamento que dirixe a deputada María Muíño.
As solicitudes presentaranse de xeito telemático na sede electrónica da Deputación da Coruña, a través da plataforma de tramitación electrónica da Deputación (SUBTeL) e o prazo de presentación remata o 31 de xaneiro.
Entre as funcións xerais e de dinamización dos servizos están o asesoramento á Administración en materia de política lingüística, velar polo cumprimento da lexislación, fomentar o uso do galego na sociedade; planificar, xestionar, executar e avaliar accións favor da lingua, propoñer programas dinamizadores ou coordinar redes de traballo para o fomento da nosa lingua.
