A conselleira do Mar, Rosa Quintana, visitou este mércores 19 de xaneiro a Lonxa de Aguiño, no concello de Ribeira, co fin de comprobar as melloras de operatividade feitas na instalación, que, segundo lembrou, beneficiouse nos últimos anos de distintas axudas para mellorar as súas infraestruturas e as condicións de traballo dos pescadores. Unhas achegas, informou a titular de Mar, ás que na convocatoria deste ano o Executivo galego destinará 7,4 millóns de euros a distribuír nas anualidades 2022 e 2023, e que se dirixen a “optimizar o funcionamento dos portos, lonxas e lugares de desembarque de produtos do mar”.
Segundo destacou a titular de Mar, destas axudas poderán beneficiarse as confrarías de pescadores, as organizacións de produtores da pesca, as cooperativas e as asociacións de marisqueo a pé e de redeiras. Tamén poderán optar a elas as administracións públicas con competencias en portos para proxectos dirixidos á pesca costeira artesanal. “Todas elas deben ser entidades sen ánimo de lucro” dixo.
Ademais Rosa Quintana lembrou que con estas achegas subvenciónase ata o 100% do investimento e detallou que son obxecto delas “as actuacións que buscan mellorar a eficiencia enerxética das instalacións, avanzar na protección do medio ambiente reducindo a pegada de carbono e mellorar a seguridade e as condicións de traballo das persoas pescadoras”. Tamén son subvencionábeis “as iniciativas destinadas a optimizar a protección dos profesionais do sector ante a alerta sanitaria pola COVID-19 e a aumentar a calidade e o control dos produtos desembarcados”.
En relación ao ano pasado, a conselleira do Mar lembrou que o Executivo galego puxo a disposición do sector máis de 5 millóns de euros para proxectos cos que modernizar os portos, lonxas e lugares de desembarque. Dentro das achegas aprobadas no 2021, a lonxa de Aguiño beneficiouse dunha axuda de máis de 91.000 euros coa que instalouse un novo pavimento impermeábel, realizáronse distintas actuacións de pintado e substituíronse os portais. A estas melloras súmanse outras realizadas nos ámbitos da descarga de produtos, a iluminación e a limpeza e que recibiron axudas entre 2018 e 2020 por un valor total de máis de 310.000 euros.
