A ABE achegará asistencia xurídica personalizada aos seus asociados

A Asociación Boirense de Empresarios (ABE) asinou este 14 de xaneiro un convenio de asistencia xurídica coa avogada Patricia González Romero para achegar unha serie de vantaxes extra aos seus asociados sobre cuestións legais que lles poden afectar directamente ao longo da súa actividade. En virtude do acordo, a letrada convértese en colaboradora da asociación aportando o seu coñecemento no ámbito da avogacía, en especial no ámbito do dereito mercantil.

O acordo asinado polo presidente da ABE, Daniel García, ten unha vixencia de un ano e inclúe unha primeira consulta gratuíta e un desconto, do 15% sobre o arancel oficial do colexio de avogados de A Coruña.

Daniel García e Patricia González aclararon que esta primeira consulta e o posterior desconto tamén será de aplicación se un membro da ABE ten unha consulta do ámbito civil ou penal.

O presidente quixo destacar que “a especialidade da xurista é a reclamación de impagos, polo que os socios e socias da ABE terán a súa disposición un novo servizo que se engade aos que xa prestabamos”

Pola banda da avogada explicou que no tocante a reclamación de impagos “estúdase cada caso de maneira particular e en función dese estudo decídese implementar unha fase de recobro amistosa ou xudicial”.

En virtude do convenio e para ambos casos os socios da patronal boirense teñen incluídos descontos respecto a tarifa oficial.