Ao abeiro do programa de actividades de Nadal organizado polo Concello de Porto do Son e dentro da sección de Contacontos de Nadal, a escritora sonense Patricia Torrado Queiruga vai ir de de xira estes días polas parroquias do seu concello, recreando o argumento do seu libro infantil Don Carlos e o Misterio dos Lucecús. As sesións comezaron esta semana en Portosín, San Pedro de Muro, Xuño e Caamaño e proseguen na tarde deste 24 de decembro en Queiruga, retomándose os contacontos a partir do 3 de xaneiro, na Biblioteca Municipal Xerardo Díaz, na Casa de Cultura de Miñortos e no Local da Comunidade de Montes de Nebra.
Argumento do libro (Baía Edicións)
Na vila comezan a xurdir sucesos inexplicábeis e, por se fose pouco, na casa contáronlles que o seu profesor, o único que os podería axudar a buscar unha explicación a tanto misterio, padece unha enfermidade que lle fai esquecer as cousas.
Xiana, Maca, Román, Sofía e Afonso convídante a desentrañar cada misterio coa axuda de don Carlos. Unhas pescudas que vos levarán a valorar o lugar no que vivides, o medio ambiente, as tradicións, o amor e os prexuízos cos que podemos atoparnos todos os días.
