Era un partido marcado de cor vermella no calendario para o Noia, a visita do Choco, equipo que marcaba a salvación. E fíxose notar. Dous goles en dous minutos sepultaron por completo as opcións do Choco de rascar algo positivo no duelo directo pola permanencia disputado no Julio Mato. Antes da hora de partido os noieses xa marchaban co definitivo 3-0 que lles fai respirar de cara á segunda volta.
Despois dun comezo algo dubitativos, no que o Choco foi mellor e gozou das mellores ocasións, no segundo tramo do primeiro acto os noieses mostraron súa mellor cara.
Así, no minuto 35, un bo balón colgado ao área de Anxo atopaba libre de marca a Ángelo que poñía o 1-0 para adiantar aos locais.E acto seguido, sen tempo para que os visitantes puidesen repoñerse do golpe, Pablo Carro no 37’ poñía o 2-0 desde o córner que cambiaba o decorado radicalmente par o segundo tempo.
Xa no segundo tempo, o conxunto de Redondela tentou reaccionar, pero sen acerto. Así, antes de que o reloxo alcanzara a hora, Jesús anotou o terceiro tanto que pechou o encontro fronte a un Choco superado, sen resposta e cos brazos caídos.
A goleada puido ser de escándalo porque os noieses viron como o xuíz de liña lles anulaba dous goles por foras de xogo. Final 3-0, e o Noia voltou a manter a portería a cero despois de sete xornadas sen facelo.
Agora, os noieses voltarán á competición o 9 de xaneiro para comezar a segunda volta fronte ao Ourense. Logo visitarán ao Polvorín co partido aprazado e ao Fabril. Un mes de xaneiro moi complicado. Con este resultado o Noia sae dos postos de descenso e sitúase na 13ª praza con 15 puntos, os mesmos que o Choco.
