A Xunta e o Concello de Boiro veñen de reforzar a súa colaboración en materia de xestión forestal e para a produción de viñedo e de especies frondosas autóctonas de calidade. Así se desprende da reunión que mantiveron este 14 de decembro o conselleiro do Medio Rural, José González, e o director xeral de Planificación e Ordenación Forestal, José Luis Chan, co alcalde deste municipio coruñés, José Ramón Romero.
Máis polo miúdo, na xuntanza tratouse a oportunidade de cooperación interadministrativa que ofrece a reforma que se está a levar a cabo no Pazo de Goiáns, poñendo o foco no seu potencial forestal. Nesa liña, falouse da posibilidade de recuperar castes de variedades de viñedo na contorna do paz, amais de instalar hortos sementeiros na parcela lindeira para a produción tanto de semente como de planta de calidade de especies de frondosas autóctonas. Asemade, tratouse a cuestión da xestión forestal en terreos públicos do termo municipal boirense.
