O director xeral de CONGALSA, empresa referente do sector alimentario a nivel estatal e internacional, entregou esta mañá os premios do cuarto Concurso de Postais do Nadal que organiza anualmente a empresa. Luis Miguel Simarro concedeu os galardóns na mañá deste 17 de decembro nun breve acto desenvolvido nas instalacións de CONGALSA, na Pobra do Caramiñal. Este ano presentáronse ao certame unha vintena de traballos.
A iniciativa diríxese fundamentalmente a nenos familiares de traballadores da compañía, en diferentes categorías de idade. O xurado de concurso estivo formado pola Dirección Xeral da empresa, a Dirección Comercial e de Mercadotecnia e a Dirección de Recursos Humanos, responsable do Proxecto Persoas (no que se enmarca a iniciativa).
Os gañadores do concurso foron Paloma Vidal, de 5 anos (na categoría baby, de 3 a 6 anos); Ana Cañas, de 7 anos (en categoría júnior, de 7 a 10 anos), e Manuel Vidal, de 13 anos (en categoría teens, de 11 a 14 anos).
Recollida de xoguetes
Amais do devandito, a empresa activou por segundo ano consecutivo unha recollida solidaria de xoguetes entre os seus traballadores. Así, fixo saber aquelas persoas interesadas en doar xoguetes poden deixalos nun colector marítimo de oito pés que se habilitou ao efecto nas instalacións da compañía. Os agasallos serán desinfectados antes da súa entrega a colectivos desfavorecidos.
