A Xunta e o Parlamento colaboran para achegar conservas aos bancos de alimentos

A conselleira de Política Social, Fabiola García, e a conselleira do Mar, Rosa Quintana, asinaron este venres 17 de decembro co presidente do Parlamento de Galicia, Miguel Ángel Santalices, un convenio de colaboración entre as institucións para a distribución de conservas de produtos do mar a persoas en situación de vulnerabilidade a través dos bancos de alimentos no marco do programa Conserva o importante. Ao acto tamén asistiu a delegada territorial da Xunta, Marta Fernández-Tapias.

Mediante esta colaboración -á que a Xunta destina 40.000 euros e o Parlamento de Galicia 20.000 euros- artéllase un “réxime de concesión de axudas aos bancos de alimentos, que se encargarán de repartir as conservas de produtos do mar”, explicaron as conselleiras, engadindo que o obxectivo é “abastecer durante estas datas con conservas de peixes e mariscos a estas entidades de carácter social e sen ánimo de lucro”. Para esta tarefa cóntase coa axuda da Asociación Nacional de Fabricantes de Conservas de Peixes, ANFACO-CECOPESCA, no marco da colaboración anual que mantén coa Consellería do Mar.

Galicia busca con esta acción subministrar conservas de peixes e mariscos ás persoas vulnerábeis.