M. A. – A primeira edición do concurso de postais do Nadal Navivolei xa está en marcha. Organizado por JEALSA e o Boiro Voleibol, un xurado elixirá a postal oficial do club de voleibol da Cachada entre os deseños que se presenten. Poden participar nenos e nenas menores de 15 anos, que deberán achegar os seus bosquexos no Pavillón da Cachada até o venres 17 de decembro. Repartiranse premios ao tres mellores deseños, así como ao centro ou club cuxos alumnos presenten unha maior cantidade de traballos. Ademais, o deseño gañador converterase na postal oficial do Boiro Voleibol.
Os participantes na primeira edición de Navivolei deberán presentar un deseño no que se incluirán a temática do Nadal, o Boiro Voleibol e o logotipo de JEALSA Rianxeira. Un xurado composto por Adrián Alves, xogador do Rotogal Boiro Voleibol; Ana Segade, directiva do Boiro Voleibol; e Margarita Hermo, directora de Relacións Institucionais de JEALSA; emitirá o veredicto unha vez conclúa o período para presentar os bosquexos. O tres mellores deseños recibirán premios consistentes en lotes de conservas da conserveira boirense e produtos relacionados co voleibol, mentres que o mellor deles converterase na postal oficial do Boiro Voleibol.
Ademais, o centro ou club deportivo cuxos integrantes presenten unha maior cantidade de traballos recibirá un lote de vinte entradas para poder asistir ao partido de Superliga que o Rotogal Boiro Voleibol e o Conectabalear Manacor disputarán o 29 de xaneiro na Cachada.
Os deseños poden presentarse en formato A-4 ou A-5 e a técnica é libre. Na parte posterior do traballo, os participantes deberán incluír os datos de contacto (nome completo, teléfono de contacto e centro escolar ou club ao que pertencen).
